НОВА ПРОВОКАЦИЈА ОД ЈУЖНИОТ СОСЕД

Грција бара да се повлече македонското вино во Германија

Вчера бил одржан состанок на кој присуствувале претставници од минстерставата за економија, за земјоделство и за надворешни работи, но било решено со официјален став за потегот на Грција кој го загрозува извозот на македонското вино, да се излезе дури в понеделник

Грција бара вината произведени од македонски винарии со ознака "Македонско вино" кои се пуштени во промет во Германија веднаш да се повлечат од рафтовите, бидејќи е спорна ознаката за географското потекло. Нашиот јужен сосед се повикува на официјалната банка на податоци на вино на ЕУ, според која вината од грчкиот регион Македонија се признати како вина со заштитени географски податоци.
Грчката амбасада дури пратила и допис до германскиот синџир супермаркети ЕДЕКА со кој ги предупредува дека ќе се соочат со судски постапки ако овој производ не го извадат од асортиманот.
"Вашата фирма веројатно без знаење на горенаведената наредба продава вино со име 'македонско вино'. Овој производ се произведува во Бившата Југословенка Република Македонија (ФИРОМ), а не во Грција и е со низок квалитет", стои во дописот од грчката амбасада.
Владата на Македонија по грчката офанзива за македонското вино, вчера не знаеше кои конкретни мерки ќе ги преземе за да го одбрани домашниот производ. Дознаваме дека вчера бил одржан состанок на кој присуствувале претставници од минстерставата за економија, за земјоделство и за надворешни работи, но било решено со официјален став да се излезе дури в понеделник. В понеделник ќе се произнесат и претставниците на винарските визби, кои вчера само кратко искоментираа дека проблемот е политички, а не во географските податоци.
"Деновиве ќе биде донесена мерка на кој начин ќе се реагира. Проблемот е економско-трговски, но и политички. До тогаш мора да се провери дали има основа за реагирање или нема", ни изјави вчера Петар Чулев, портпарол на МНР.
Од Министерството за земјоделство велат дека до германската компанија која го прави увозот на виното веќе се испратени извадоци од Законот со кои се регулирани точните ознаки на виното и сортите грозје. (И.С.)