ЈУВЕНТУС ИЗГЛЕДА ЌЕ ИЗВИСИ

Пандев е најблиску до Лондон

Горан Пандев и Лацио се договорија околу евентуалниот трансфер, пишува "Кориере дело спорт". Според италијанскиот весник, македонскиот репрезентативец нема да го искористи членот 17 на ФИФА за да не го изневери Лацио, а претседателот Клаудио Лотито ќе ги разгледа сите понуди за играчот. Изгледа дека римскиот клуб конечно потклекна пред инсистирањето на Пандев да си замине, бидејќи ризикува да остане со празни раце по една година, кога му истекува договорот на струмичанецот.
Во последниве денови, најсериозен интерес покажува Арсенал. Според "Дејли Мејл", лондонскиот клуб има подготвено 17 милиони фунти (нешто под 20 милиони евра) за трансферот на Пандев. Ако тоа е вистина, трансферот би можел да се реализира во наредните неколку дена и Јувентус, кој претходно важеше за фаворит, нема шанси да се спротивстави. И, секако, таа понуда е повеќе од атрактивна за Лацио.
Што се однесува до другите клубови, Баерн Минхен повеќе не е во игра, иако го следеше Пандев уште од неговите настапи во Лигата на шампионите. Сега, од Бундеслигата, заинтересиран е шампионот Волфзбург, кој, најверојатно, ќе остане без Един Џеко. Од Шпанија, тоа е Атлетико Мадрид. Сепак, изгледа дека иднината на Пандев, ако Јувентус не реагира брзо, е во Лондон.