СО НОВИТЕ РЕФЕРЕНТНИ ЦЕНИ

Четири пати повисока партиципација за лековите за остеопороза

Здружението за остеопороза го повика Фондот за здравствено осигурување да ја преиспита листата на предлог-референтни цени за лековите за остеопороза, бидејќи, како што велат, со новите цени болните ќе треба да плаќаат три до четири пати повеќе за партиципација. Елена Стојковска, секретар на Здружението, вели дека со сегашните цени на лековите за потребната месечна терапија плаќаат 570 денари, додека со новите референтни цени партиципацијата ќе им се зголеми на 1.600 и 1.900 денари.
Членовите на ова здружение објаснуваат дека Фондот со новата предлог-листа ја изедначил референтната цена на сите лекови за остеопороза и ја зел онаа на најевтиниот лек, па поради тоа им пораснала доплатата на поскапите и поквалитетни лекови. Тие објаснуваат дека поевтините лекови, кои треба да ги примаат секој ден, им создаваат здравствени проблеми во дигестивниот тракт, често проследено со крвавења во дебелото црево, додека поновите и поскапи лекови кои се пијат на месечен или шестмесечен период им обезбедуваат нормален живот.
"Многу пациенти се откажуваат од терапијата за остеопороза токму поради проблемите што овие лекови им ги прават на дигестивните органи. Ако доплатата за поновите и поквалитетни лекови се покачи, ќе се зголеми бројот на болни што не се лекуваат, а тоа пак прави дополнителни проблеми, бидејќи остеопорозата е хронична болест, која прогресира и кај која се јавуваат скршеници на коските, за чиј третман потоа се трошат уште повеќе пари и се нанесува и трајна штета на пациентите", вели проф. Иванка Стефановска, член на Здружението.
Членовите на Здружението тврдат дека во најблиското опкружување највисоката партиципација за овие лекови е до 10 евра, додека со новата листа на цени кај нас таа ќе се движи од 25 до 30 евра. (Е.А.)