АРГЕНТИНЦИТЕ РЕШИЈА ДА БИРААТ НОВ СЕЛЕКТОР

Марадона не доби нов договор

Аргентинската фудбалска асоцијација (АФА) со едногласна одлука се изјасни против обновувањето на договорот на селекторот Диего Армандо Марадона, кој со тоа го заврши својот 21-месечен мандат, во текот на кој испроба над сто играчи во репрезентацијата и војуваше со медиумите. Судбината на Марадона стана неизвесна по елиминацијата на Аргентина од Германија во четврт-финалето на Светското првенство во Јужна Африка и челниците на АФА го загубија трпението откако Марадона побара да не се прават измени во неговиот стручен штаб.
- Промени во стручниот штаб на Диего беа неопходни и затоа не можевме да се договориме. Никој не е исфрлен, едноставно, договорот не беше обновен, зашто немаше услови за тоа - изјави претседателот на АФА Хулио Грондона, кој претходно му даваше голема поддршка на Марадона, за потоа да се судрат околу неговиот помошник и голем пријател Алехандро Манкузо.
И покрај раната елиминација од СП, Марадона и националниот тим добија херојски пречек во татковината, а претседателката Кристина Фернандес побара тој да остане на својата функција. Марадона се изјасни дека би сакал да продолжи, но еден од условите беше да има целосна контрола врз изборот на своите помошници.
Марадона привремено ќе го замени селекторот на младинците Серхио Батиста, а како долгорочни решенија се споменуваат Карлос Бјанки, Алекс Сабелја, Марсело Бјелса...